Etiketa honen artxiboa: langileak

Babajan itzela Euskararen Eguna ospatzeko!

Aurten bigarren urtez, bazkari ederra egin dugu udal langileok Euskararen Egunaren aitzakian. Zapatuan, abenduaren 3an, da berez Euskararen Nazioarteko Eguna, baina guk pare bat egun arinago hasi ditugu ospakizunak!

Babajan ederra izan genuen Erretentxu soziedadean, Ivan eta Ekain sukaldarien eskutik. Eskerrik asko, bioi!! Kultura saileko Anderrek eta Estebanek postre gozoa ekarri zuten, eta Tonik berak egindako patxarana!

Hemen dituzue atzoko egunez ateratako argazki batzuk. Hau urteroko hitzordu bihurtzen dabil! Aupa zuek!

Eta badakizue; aurten, euskarak 366 egun!

Euskararekin lotutako bizipen onen bildumatxoa

Datorren astean, abenduaren 3an, Euskararen Nazioarteko Eguna ospatuko dugu, eta horren aitzakian, udal langile batzuei euskararekin lotutako bizipen on bat kontatzeko eskatu diegu. Hona hemen bildumatxoa:


Gure herriko lehen ikastolan

Nerea Erauzkin – Informatika

bizipen-ona-ikastola

Nik gogoratzen dudan bizipen onena gure herrian hasi ginen lehenengo ikastola da, elizpeko lokal baten haur hezkuntzako umeak euskaraz ikasten hasi ginen. Gehienak eskola nazionalera joaten ziren eta guk euskaraz ikasten genuen.

Oso oroitzapen politak ditut. Oraindik orduko andereñoak ikusten nauenean ezagutu egiten nau.

 

Kanpoan etxean bezala sentitzea
Leire Olivenza – Musika Eskola

bizipenak-kanpoan-euskaldunekin

Euskararekin lotutako bizipen on bat kontatzea  eskatu didate, hiru-lau lerrotan, ez dakit hiru-lau lerrotan kapaz izango naizen bizipenak kontatzeko, euskararekin lotutako bizipen on asko baititut. Adibidez, oso gustukoa dut, atzerrian egoten naizenean euskaldun batekin topo egitea. Etxetik oso urrun egonda, etxean egongo banintz moduan sentitzen naiz. Gainera, normalean gure artean harremana sortzen da eta adiskidetasuna ere bai.

 

Beti gaztelaniaz lan egingo nuela uste nuen
Igor Zorrakin – Bulego Teknikoa

bizipenak-lana-euskaraz

Eskolako ikasketak euskaraz egin ondoren, unibertsitatean gaztelaniaaz ikasi behar izan nuen. Nire ogibidea beti gaztelaniaz izango zela pentsatu izan nuen ere enpresa pribatuan lanean hasi nintzenean. Gero Durangoko Udalean lan egiten hasterakoan pentsaera hori desagertu zen, eta zorionez euskara egunerokotasunean sartuta daukat jadanik.

 

Antzerkiaren bidez, euskararen aberastasunaz maitemintzen
Arantza Arrazola – San Agustin kultur gunea

bizipenak-antzerkia

Orian dela 20 urte hasi nintzen antzerki munduan lan egiten. Enpresa pribatu baten hasi nintzen, antzerki produkzioa eta distribuzioa egiten. Nire lana Euskal Herritik gora eta behera ibiltzea zen antzerki talde batzuk eskaintzen. Eta horrela ezagutu nuen hurbiletik euskararen aberastasuna, gure hizkuntza anitz honen bizitasuna, azentu ezberdinak, politak denak, batzuetan ulertu ezineko hitzak ere tartean.

Jadanik ez noa herriz herri, baina asko gustatzen zait hizkera ezberdinak entzutea eta antzerki emanaldietan ezkertzen dut bakoitzak bere hizkeran berba egitea, askoz ere naturalagoa eta aberatsagoa. Eta pixkanaka pixkanaka denon artean animatu jendea euskarazko emanaldietara.

 

“Zu etzara hemengoa, ezta?”
Ekain Muñoz – Ekonomia saila

bizipena-euskalkien-nahasketa

Igual, konta dezakedan gauza xelebre bakarra nire “euskalkiari” buruzkoa da. Edo nire euskalki faltarena, alegia! Gurasoak erdaldunak ditudanez, Donostiako ikastola garbizale bateko euskara ikasi nuen. Euskara batu-batua, hortaz. Gazte garaitan Leitza inguruko lagunak izan ditut, Tolosaldeko neska ohia, etab. eta orain, berriz, Oñatin bizi, eta Durangon lana. Azkenean, belaki baten erara, bakoitzean zer edo zer xurgatu nuen -euskalki propiorik errotuta ez izatearen arazoak-, eta egun, kriston nahasmasa daukat! Jendearekin hitz egiten dudanean, leku guztietan esaten didate: “zu etzara hemengoa, ezta?” Baita Donostian ere!!!

 

Durangoko gaztetxoekin irratigintzan
Idoia Azkorbebeitia – Durango Irratia

bizipenak-irrati-tailerrak

Durango Irratian euskarak integrazio eta elkarbizitzarako duen gaitasuna lehen pertsonan bizitzen dugu. Horrela gertatzen da duela bost urte martxan jarritako irrati tailerren baitan. Beste herrialdeetako eta bertoko neska mutilek euskara dute amankomun eta egunerokotasunean adiskidantza eta bizitzarako erabiltzen duten hizkuntza euskara da. Eta euskaraz prestatzen dituzte elkarrizketak, mahai-inguruak, txisteak, asmakizunak, jokoak…

********************************************************

Langile batzuei proposamena egin, eta sei hauek animatu dira euren bizipenak kontatzera. Besteok, animatzen zarete? Baten batek bere esperientziak konpartitu gura baditu, idatzi trebatzailea@durango.eus-era, eta argitaratuko ditugu blogean!

Abenduaren 1ean, babajana!

babajana-iragarpena-blogean

Kaixo, guztioi!

Laster dator abenduaren 3a, Euskararen Eguna. Egun hori ospatzeko, aurten ere bazkaria antolatzea pentsatu dugu. Euskararen Eguna zapatua denez, eta tartean zubia ere badagoenez, bazkaria abenduaren 1ean egitea pentsatu dugu, osteguna.

Iazko moduan, Erretentxu txokoan izango da bazkaria, eta menua: babajana! Ivanek esan digu baba gozo-gozoak prestatzen dituela… probatu beharko ditugu! Etxeko postre goxoak eramatea pentsatu dugu; proposamenen bat badaukazue, beso-zabalik hartuko dugu. Osteguna izanda, gura duenak pintxo potean luzatu ahalko du arratsaldea!

Bazkarian izena emateko, idatzi nire emailera (trebatzailea@durango.eus) azaroaren 24a baino lehen. Animatu, une goxoa pasako ditugu eta!

Liburuaren Eguna: gomendioak eta ekitaldiak

Bihar, apirilak 23, Nazioarteko Liburuaren eta Autore Eskubideen Eguna da, eta egun horren aitzakian, aurten ere, udaletxeko hainbat lankideri euskarazko liburuak gomendatzeko eskatu diegu.

Gainera, Durangon, pare bat hitzordu aipatu behar ditugu Liburuaren Eguna dela eta ez dela. Gaur, barikua, 18:00etatik gauerdira arte, Durangaldeko 240 pertsonek III.Irakurraldian parte hartuko dute Plateruena kafe antzokian, ‘Hitzez eta ahotsez’ ekimenak antolatuta. Eskualdeko idazleen lanak irakurri eta abestuko dituzte sei orduz. Bestalde, bihar, zapatua, 16:00etatik aurrera, Durangoko Arteka, Hitz eta Urrike liburu-dendak kalera irtengo dira: Andra Mariko elizpera aterako dituzte liburuak. Deskontuak egongo direla jakinarazi dute, eta gainera, liburua erosten duten herritarrei Cengotita lora-dendak eskainitako landare bat oparituko diete.

Hona hemen, lankideen gomendioak:

LIBURUA-Orain hilak ditugu

ORAIN HILAK DITUGU (poesia)

Egilea: Karmele Jaio

Gomendioa egin duena: Maite Euba (Udal Euskaltegia) eta Amaia Eguzkitza (Informatika saila)

Zergatia:
Maite Euba: “Ezin ukatu Karmele Jaio nire idazle kuttunetakoa dela. Hurbila, sentibera, egunerokoari erreparatzen diona (…) Ez naiz poema-liburu irakurle trebea, baina honetan harrapatu egin nau eta ziztada egin dit”

Amaia Eguzkitza: “Poesia da, eta egunerokotasuneko gaiak jorratzen ditu: minak, hutsuneak, gazigozoak. Emozioekin konektatzen lagundu dit”

Maite Eubak, gainera, liburuko olerki bat aukeratu du; Gosari aztarnak, “askoren artean laster Amaren Eguna ere badelako eta nostalgiari bere lekutxoa egitearren”. Hemen duzue olerki hori:

Gosari aztarnak

Ez dira domeketako pagak,
ez dira marrazki bizidunak,
parkeko jolasak
edo benetako lagunak
faltan sentitzen ditudanak.

Ez dira uretan egindako dzangak,
futboleko izerdiak,
amaigabeko udak.
Ez dira gurin zaporezko meriendak,
esnetan bustitako gailetak
faltan nabari ditudanak.

Goizero
nire ezpainetako gosari aztarnak
txistuaz bustitako zapiarekin
garbituko dituen norbait
oraindik badela jakitea da
benetan falta zaidana.

LIBURUA-Arotzaren eskuak

AROTZAREN ESKUAK (nobela)

Egilea: Alberto Ladron

Gomendioa egin duena: Iñigo Andres (Bulego Teknikoa)

Zergatia: “Liburu honek misterioa eta genero poliziako biltzen ditu. Gaur egungo emakume bat bere aitonarena izandako baserrira joaten da bizitzera bake bila, eta aurkikuntza zirraragarri bat egiten du baserri aurreko lur-azpian. Hortik aurrera misterioa eta erahilketa batzuen aztarnen atzetik abiatzen da. Gerra Zibila, naziak… Duela 70 urte gertatutakoaren korapiloa askatzen joaten da poliki-poliki”.

 

LIBURUA-Atertu arte itxaron

 

 

ATERTU ARTE ITXARON (nobela)

Egilea: Katixa Agirre

Gomendioa egin duena: Amaia Eguzkitza (Informatika saila)

Zergatia: “Entretenigarria da, eta, Euskal Herriko parajeak aitzaki,  historia arin eta entretenigarri bat kontatzen du, gogoeta ugarirekin”.

LIBURUA-Lili eta biok

 

 

LILI ETA BIOK (nobela)

Egilea: Ramon Saizarbitoria

Gomendioa egin duena: Toni Atutxa (Euskara saila)

Zergatia: “Faustino Iturbe idazleak eta Lili neskatoak atzera-aurrerako jauziak egiten dituzte gaur-gaurko bizipenetatik iraganeko misterioetara, eta atzera begirakoan gerra zibil garaiko gertaera mingots bat harilkatzen dute oihal-txatal urratuak apurka-apurka josiz behinolako gertaeren oihal osoa osatu arte.”

 

LIBURUA-mariak20urteditu
MARIAK 20 URTE DITU (komikia)

Egileak: Maria Gallardo eta Miguel Gallardo

Gomendioa egin duena: Esti Albizu (Udal Bilblioteka)

Zergatia: “Miguel Gallardok Maria bere alabak munduarekin zelako harremana duen kontatzen du komiki bidez. Izan ere, autismoa du Mariak, eta bere aitak udan egindako oporraldian gertatutakoak samurtasun handiz eta umorez kontatzen ditu. Komikizale amorratuak gara bibliotekan, eta dagoeneko kalitatezko bilduma handia daukagu; hauxe eta aurretik kaleratutako Maria eta ni, tartean”

untitled

 

 

ERRESUMAREN EGUNSENTIA (nobela)

Egilea: Mila Salterain

Gomendioa egin duena: Nagore Uribe-Etxebarria (Andragunea)

Zergatia: “Durangaldean oinarritutako eleberri historikoa delako, aukera paregabea gure historiaren zati bat ezagutzeko”

 

 

LIBURUA-Londres kartoizkoa da

 

LONDRES KARTOIZKOA DA (nobela)

Egilea: Unai Elorriaga

Gomendioa egin duena: Fernan Ruiz (Euskara saila)

Zergatia: “Intrigaz betetako liburua da. Idazteko estilo arina eta erabat ulergarria erabiltzen du, beti, esango nuke, Unai Elorriagak. Mamia ulertu eta hariari jarraitzea, ostera, zail samarra egin daiteke. Pertsonaia asko agertzen dira eta izenekin korapilatu egin gaitezke. Psikologiatik asko du, eta fikzioa da, baina gaur egun, oraindik, bizi ditugun zenbait gai aurkezten dizkigu idazleak: diktadura, torturak, buruko gaitzak… Gomendagarria, benetan”.

Durangoko Udal Euskaltegiko ikasleek ere egin dute liburuak gomendatzeko ariketa. Hemen dituzue gomendioak, Udal Euskaltegiko blogean.

Sei astez euskaraz aritzeko erronka hasi dute bigarren eta hirugarren pisuan

talde-lana

Martxan da Ostadarra lehiaketa! Bulego Teknikoan eta udaletxeko 3.pisuan erronka berezi bati ekingo diote gaur: sei astez, euskaraz berba egiteko izango dituzten aukera guztiak aprobetxatzen saiatuko dira.

Solairu bakoitzean hiru taldetan banatu dira langileak, eta egunerokotasunean ahalegin hori egiteaz gain, belarriak tente edukiko dituzte, aste amaieran beste taldeen jarduna baloratu beharko dutelako. Norbanakoen ahalegina ere sarituko dute, jakina baita beti eta guztientzat ez dela erraz-erraza izaten lanean euskaraz aritzea. ANIMO GUZTIOI, ETA ONDO PASA JOLASEAN!

Durangoko euskararen datu batzuk
Lehiaketa hasi aurretik motibazio saiotxo bat egin genuen, eta, bertan, Durangoko datu soziolinguistiko batzuk errepasatu genituen. Bloga datuok gogoratzeko leku aproposa da.

Eustatek argitaratu dituen azken datuen arabera, hauxe zen, 2011n, Durangoko euskararen ezagutzaren grafikoa:

Durangoko euskararen ezagutza1

Agian batzuri zalantza bat sortuko zitzaizuen: zeintzuk dira elebidun hartzaileak? Bada, euskaraz ondo moldatu ez arren, ulertzeko gai direla adierazi duten durangarrak dira. Honek, zera esan nahi du:

Durangoko euskararen ezagutza2

Euskaraz ulertuak izateko probabilitate nahiko handia dagoela Durangon!

Erabilerari dagozkion datuak, ordea, ez dira hain onak: 2011ko Eustaten ikerketan, durangarren % 31k adierazi zuen erabiltzen zuela euskara etxean.

Denon esku dago, pausoz pauso, konplexuak atzean utzita, eta bakoitzaren gaitasunak apurka hobetzen, erabileraren datuak igotzea. Administrazioan ez da beti erraza izaten, baina bakoitzak bete ahal dituen helburuak jarrita, bagoaz aurrera bidean!