Etiketa honen artxiboa: hizkuntza ohiturak

Euskaraldia dator: Euskal Herri osoan hizkuntza ohiturak aldatzeko egitasmoa

Hizkuntza ohiturak aldatzeko ariketa egingo dugu milaka herritarrek 2018ko udazkenean. Euskaraldian 11 egunez euskaraz berba egiteko eta entzuteko aukerak aprobetxatzeko deia egingo da. Euskal Herri osoko 340 herri hasi dira ekimena antolatzen, tartean, Durangaldeko herri guztiak. Asteon egin da eskualdeko aurkezpena prentsara begira.

Baina zer ote da Euskaraldia? Eusko Jaurlaritzak eta Euskaltzaleen Topaguneak egindako hitzarmen batetik jaio den ariketa soziala da. Azaroaren 23tik abenduaren 3ra, hamaika egunez, euskaraz bizitzeko aukerak handitzea da helburua.

Bi rol egongo dira, txapa bidez identifikatuta:

  • AHOBIZI: Euskaraz ulertzen duten guztiei euskaraz berba egiteko konpromisoa hartuko dute, eta ezezagunei lehen hitza euskaraz egingo diote.
  • BELARRIPREST: Euskaraz ulertzen duten pertsonak dira, eta gainerakoei euskaraz aritzeko gonbidapena egingo diete. Euskaraz edo gaztelaniaz erantzungo dute, gaitasunaren arabera.

Amankomunazgoak argitaratu duen bideo honetan argi azaltzen dira bi rol horien funtzioak:

Ahoak eta belarriak aktibatzea da, beraz, kontua. Baina lanketa handia duen zerbait da hau: herritarrei Euskaraldiak zer dakarren azaltzeko batzordeak sortu dira herriz herri, eta Durangon ere hasi du bere bidea lantalde batek. Udaleko langileok ere animatuko gara hizkuntza ohiturak aldatzera? Aurrerago ere izango dugu gai honi buruz berba egiteko aukera!

Lantokietan hizkuntza ohiturak aldatzeko ekimenak fruituak ematen ari dira

BSH konpainiaren lantegia Gasteizen. / BERRIAEusleen metodologia erabilita, lanean hizkuntza ohiturak aldatzeko probak gero eta hedatuagoak dira. Zer da eusleen kontua, baina? Udaleko langile batzuk egina dute proba. Labur esanda, epealdi baten, lankideetako batzuk euskarari eusteko ardura hartzen dute, eta horrek “kutsatu” egiten du giroa, eta handitu egin ohi da euskararen erabilera. (iaz lankide guztiak eusle izan ziren udaletxeko bigarren eta hirugarren pisuan eta ikastetxeetako esperientziaren berri ere eman genuen beste baten)

BSH konpainiaren lantegia Gasteizen. / BERRIA

Bada, azken hileotan hamahiru lantokitan probatu dute metodologia hori, eta neurtu egin dute esperientziaren aurretik zegoen erabilera, esperientziaren ostekoa, eta handik hiru hilabetera neurtutakoa. Jasotako datuen arabera, eusleen metodologiarekin jardun eta hiru hilabetera 11,4 puntu hazi da euskararen erabilera.

Soziolinguistika Klusterrak eta EHUk egin dute ikerketa.

Gaian gehiago sakondu gura baduzue, Soziolinguistika Klusterraren webgunean duzue albistea eta ikerketa beraren argitalpena.

Zelan joan da sei astez euskaraz lan egiteko erronka?

Bulego Teknikoan eta udaletxeko hirugarren solairuan erronka berezi bati heldu zioten apirilaren 11n: sei astez euskaraz lan egiteko aukerak aprobetxatzen ahalegindu dira, lehiaketa formatuan planteatutako ekimenean. Bigarren pisukoak hiru taldetan eta hirugarren pisukoak beste hiru taldetan, astero lankideek egindako jarduna baloratu behar izan dute, eta euskaraz lan egiteko ahaleginak saritzen ere ibili dira. Lehiaketa amaitzerakoan, bideoan jaso ditugu erronkako bizipenak. Ondorio nagusia? Lankideen arteko hizkuntza ohiturak apurka-apurka aldatu daitezkeela argi dago, eta giro umoretsuan egiten bada, askoz hobe! Euskaraz lan egin ahal izateko erronka ugari daude oraindik gainditzeko, eta ekingo diegu horiei ere!

 

Sei astez euskaraz aritzeko erronka hasi dute bigarren eta hirugarren pisuan

talde-lana

Martxan da Ostadarra lehiaketa! Bulego Teknikoan eta udaletxeko 3.pisuan erronka berezi bati ekingo diote gaur: sei astez, euskaraz berba egiteko izango dituzten aukera guztiak aprobetxatzen saiatuko dira.

Solairu bakoitzean hiru taldetan banatu dira langileak, eta egunerokotasunean ahalegin hori egiteaz gain, belarriak tente edukiko dituzte, aste amaieran beste taldeen jarduna baloratu beharko dutelako. Norbanakoen ahalegina ere sarituko dute, jakina baita beti eta guztientzat ez dela erraz-erraza izaten lanean euskaraz aritzea. ANIMO GUZTIOI, ETA ONDO PASA JOLASEAN!

Durangoko euskararen datu batzuk
Lehiaketa hasi aurretik motibazio saiotxo bat egin genuen, eta, bertan, Durangoko datu soziolinguistiko batzuk errepasatu genituen. Bloga datuok gogoratzeko leku aproposa da.

Eustatek argitaratu dituen azken datuen arabera, hauxe zen, 2011n, Durangoko euskararen ezagutzaren grafikoa:

Durangoko euskararen ezagutza1

Agian batzuri zalantza bat sortuko zitzaizuen: zeintzuk dira elebidun hartzaileak? Bada, euskaraz ondo moldatu ez arren, ulertzeko gai direla adierazi duten durangarrak dira. Honek, zera esan nahi du:

Durangoko euskararen ezagutza2

Euskaraz ulertuak izateko probabilitate nahiko handia dagoela Durangon!

Erabilerari dagozkion datuak, ordea, ez dira hain onak: 2011ko Eustaten ikerketan, durangarren % 31k adierazi zuen erabiltzen zuela euskara etxean.

Denon esku dago, pausoz pauso, konplexuak atzean utzita, eta bakoitzaren gaitasunak apurka hobetzen, erabileraren datuak igotzea. Administrazioan ez da beti erraza izaten, baina bakoitzak bete ahal dituen helburuak jarrita, bagoaz aurrera bidean!