Etiketa honen artxiboa: erronka

Ikasleak eusle: euskararen erabilera indartzeko esperimentua Eibarren

Eibarko San Andres ikastetxea-eusleak

Eibarko San Andres ikastetxeko ikasleak, ikasturte amaierako jaialdian (Argazkia: Etakitto.eus)

“Mikel, euskaraz!!!” “Ane, zer zabiltza erdara hutsean!” Irakasle askoren ardura da: eskoletan irakasgaiak euskara hutsean eman arren, ikasleek euren artean gaztelaniaz egiteko joera handia izaten dute, eta jolasorduan, sarri, gaztelania izaten da nagusi. Egoera horri buelta eman, eta ikastetxe barruan euskaraz berba egiteko aukerak sortzeko, Eusleen metodologia jarri dute martxan Eibarko San Andres ikastetxean. Funtzionatu du. Izan ere, ikasleek misio moduan hartu dute elkarrizketetan euskara mantentzea, eta emaitzak ere ikusi dituzte.

san-andres1Udaletxe barruan egin izan dira erabilera sustatzeko antzeko probak, azkena udaberri honetan bertan. Eibarko ikasle hauen kasuan, hogei ikasleko geletan bost ikaslek hartzen izan dute astero elkarrizketetan euskarari eusteko ardura. LHko 3.mailatik 6.mailarako ikasle guztiek parte hartu dute egitasmoan, eta esperimentu moduan planteatu diete irakasleek. Euskararen erabilera neurtu, eta eusleek beste ikaskideengan zelako eragina duten ikusi ahal izan dute grafikoen bidez.

Emaitza onak izan dituzte, eta datorren ikasturtean ere ekingo diote eusleen dinamikari. Ikasleak konturatu dira euskaraz zenbat eta hitz gehiago egin, besteek ere gehiago egiten dutela, eta ohorea izaten da eurentzat eusle izatea. Eibarko Etakitto aldizkarian ikasturte amaierako jaialdiaren berri eman dute. Festa egiteaz gain, datorren ikasturtean eusle berri izango diren 2.mailako ikasleei ekimenaren berri emateko aprobetxatu dute jaialdia.

Zelan joan da sei astez euskaraz lan egiteko erronka?

Bulego Teknikoan eta udaletxeko hirugarren solairuan erronka berezi bati heldu zioten apirilaren 11n: sei astez euskaraz lan egiteko aukerak aprobetxatzen ahalegindu dira, lehiaketa formatuan planteatutako ekimenean. Bigarren pisukoak hiru taldetan eta hirugarren pisukoak beste hiru taldetan, astero lankideek egindako jarduna baloratu behar izan dute, eta euskaraz lan egiteko ahaleginak saritzen ere ibili dira. Lehiaketa amaitzerakoan, bideoan jaso ditugu erronkako bizipenak. Ondorio nagusia? Lankideen arteko hizkuntza ohiturak apurka-apurka aldatu daitezkeela argi dago, eta giro umoretsuan egiten bada, askoz hobe! Euskaraz lan egin ahal izateko erronka ugari daude oraindik gainditzeko, eta ekingo diegu horiei ere!

 

Sei astez euskaraz aritzeko erronka hasi dute bigarren eta hirugarren pisuan

talde-lana

Martxan da Ostadarra lehiaketa! Bulego Teknikoan eta udaletxeko 3.pisuan erronka berezi bati ekingo diote gaur: sei astez, euskaraz berba egiteko izango dituzten aukera guztiak aprobetxatzen saiatuko dira.

Solairu bakoitzean hiru taldetan banatu dira langileak, eta egunerokotasunean ahalegin hori egiteaz gain, belarriak tente edukiko dituzte, aste amaieran beste taldeen jarduna baloratu beharko dutelako. Norbanakoen ahalegina ere sarituko dute, jakina baita beti eta guztientzat ez dela erraz-erraza izaten lanean euskaraz aritzea. ANIMO GUZTIOI, ETA ONDO PASA JOLASEAN!

Durangoko euskararen datu batzuk
Lehiaketa hasi aurretik motibazio saiotxo bat egin genuen, eta, bertan, Durangoko datu soziolinguistiko batzuk errepasatu genituen. Bloga datuok gogoratzeko leku aproposa da.

Eustatek argitaratu dituen azken datuen arabera, hauxe zen, 2011n, Durangoko euskararen ezagutzaren grafikoa:

Durangoko euskararen ezagutza1

Agian batzuri zalantza bat sortuko zitzaizuen: zeintzuk dira elebidun hartzaileak? Bada, euskaraz ondo moldatu ez arren, ulertzeko gai direla adierazi duten durangarrak dira. Honek, zera esan nahi du:

Durangoko euskararen ezagutza2

Euskaraz ulertuak izateko probabilitate nahiko handia dagoela Durangon!

Erabilerari dagozkion datuak, ordea, ez dira hain onak: 2011ko Eustaten ikerketan, durangarren % 31k adierazi zuen erabiltzen zuela euskara etxean.

Denon esku dago, pausoz pauso, konplexuak atzean utzita, eta bakoitzaren gaitasunak apurka hobetzen, erabileraren datuak igotzea. Administrazioan ez da beti erraza izaten, baina bakoitzak bete ahal dituen helburuak jarrita, bagoaz aurrera bidean!

‘Egian euskaraz bizi nahi dugulako’ erronkako bizipenak

Donostiako Egia auzoko herritarrek erronka berezian parte hartu dute: zortzi astez euskara hutsez bizitzeko aproba egin dute, eta auzoko hainbat eragilek parte hartu dute ekimenean. Zazpi astez, aste beteko txandak egin dituzte Egiako eragileek, eta zortzigarren astean norbanakoek hartu dute lekukoa. Bideo honetan bizi izan dutenaren berri eman dute egiatarrek. “Esperientzia martzianoa” izan da batentzat; beste batek dio konturatu dela lehen hitza merkatariekin erdaraz egin ohi duela, koadrilako hizkuntza ohiturez jabetu dira beste batzuk… Anekdota bitxiak daude tartean!

‘Egian euskaraz bizi nahi dugulako’ erronkaren bultzatzaileak Lutxo Egia idazle bilbotarrak egindako performance-an oinarritu dira ekimena antolatzeko.