Etiketa honen artxiboa: durango

Kalean neurtutako elkarrizketetatik %22,7 izan dira euskaraz

Datu interesgarriak eman zituzten atzo Durangoko hizkuntza-erabileraren kale-neurketaren aurkezpenean.  Soziolingustika Klusterrak egindako azterketaren arabera, kalean entzundako elkarrizketetatik %22,7 euskaraz izan dira, eta %75,4 gaztelaniaz. Beste hizkuntza batzuetan erabilera % 1,9koa izan da. Kontuan izan behar da Durangoko biztanleen % 49 dela euskalduna, % 27 ia euskalduna eta %24 erdaldun elebakarra.

Adin-tarteka, umeak dira euskara gehien erabiltzen dutenak (% 37,8). Euskara gutxien erabiltzen dutenak, berriz, adinekoak dira (% 14,5). Gazteen erabilera  % 25,2koa izan da eta helduena  % 18,8koa.

Auzoka berriz, Alde Zaharrean (% 29,6) entzun dute euskara gehien; ondoren Ezkurdi–Madalena eremua kokatzen da (% 17,8) eta azkenik, Ibaizabal–Landako eremuan entzun dute euskara gutxien (% 14,1).

Ikerketak hizkuntza ohituren inguruko beste datu esanguratsu bat azaleratu du. Umeek eta helduek osatutako taldeetan entzun da euskara gehien:  % 42,2. Baina, hala ere, umeak bakarrik (nagusirik barik) daudenean % 19,7koa da euskarazko erabilera; eta, aldiz, nagusiak euren artean (umerik barik) ari direnean, % 14,3tan darabilte euskara.

Beheko taulan duzue datu nagusien laburpena, eta gehiago sakondu gura baduzue, aurkezpenerako erabili duten txostena sarean dago, lotura honetan.

Durangoko kaleetan euskara zenbat erabiltzen den neurtu dute

Ehun elkarrizketetatik zenbat dira zuen ustez euskaraz Durangoko kaleetan? Soziolinguistika Klusterrak ikerketa egin du aurten; ekainean eta uztailean, hainbat egunez, egin dute kale neurketa, eta haren emaitzen berri asteazken honetan, abenduak 13, jakingo dugu.

Soziolinguistika Klusterreko Asier Basurto izango da Plateruena Kafe Antzokian emaitzak eta ondorioak azaltzen. Datuon berri izan eta hausnarketan eta tertulian aritzeko egun egokia izan daiteke; aurkezpenaren ostean luntxa egongo da 😉

Euskal Herri osora zabalduko da euskararen erabileran eragiteko egitasmoa

Atzo aurkeztu zuten jendaurrean Euskaraldia ekimena.

Hizkuntza ohiturei buelta bat emateko egitasmoa jarriko da abian 2018an. Azken bi urteotan hainbat herritan egin dituzten erronken bidea jarraituz, Euskal Herri osora zabalduko da ’11 egun euskaraz’ ekimena. 2018 osoan hizkuntza aktibazioaren inguruko formazioan eta girotzean lan egin ostean, 2018ko azaroaren 23tik abenduaren 3ra euskaraz bizitzeko erronka planteatuko da. Horretarako jarrera eta konpromiso zehatzak izango dituzten figura bi egongo dira herritarren artean: AHOBIZI-ak eta BELARRIPREST-ak.

Erronkarekin bat egin gura duten herritarrek Ahobizi edo Belarriprest izatea aukeratuko dute, eta hamaika egunez, figura horien txapa eroango dute soinean, besteekiko harremanetan denek jakin dezaten zer konpromiso hartu duten.

Durangon ere bai!
Durangon ere martxan jarriko da egitasmoa, eta abenduaren 1ean egingo da aurkezpena, Andra Mariako elizpean, 19:30ean. Karrika antzerki taldekoen laguntzarekin, umorea lagun azalduko dute zer den Euskaraldia.

Zer diozue, udal langileak animatuko gara?

 

Badator Euskararen Eguneko babajana! Abenduaren 1ean. Bazatoz?

Aurten hirugarren urtez, Euskararen Eguna bazkari baten bueltan ospatzeko asmoa dugu!

Iaz babajan ederra prestatu ziguten Ivanek eta Ekainek Erretentxu soziedadean, eta, aurten ere, txoko horretan elkartuko gara, babajanean. Eskerrik asko, Ivan, aurten ere soziedadeko ateak zabaltzeagatik!

Abenduaren 3a, Euskararen Eguna, igandea denez, ostiralean egingo dugu bazkaria, abenduaren 1ean. Zer diozu, animatzen zara?

Izena emateko, idatzi emaila trebatzailea@durango.eus helbidera, azaroaren 27a baino lehen.

Eta azken ohartxo bat: begetarianoa bazara, lasai! Abisatu, eta babak eta “sakramentuak” aparte prestatuko ditugu, zeuk ere gozatu ahal izateko!

Jaietako zapia kaleratu du GUKA euskaltzaleen bilguneak

Berton ditugu sanfaustoak, eta asteon jaietarako dituen asmoak plazaratu ditu Durangoko euskaltzaleen GUKA taldeak. AEK, Euskal Herrian Euskaraz, Ibaizabal Ikastola eta Berbaro Taldea biltzen ditu GUKAk. Urte osoan euskaraz bizitzeko aukerak sortzen egiten du lan, eta jaietan ere presentzia izaten du txosnagunean.

Aurten jaietarako zapia kaleratuko dute euskararen aldeko aldarria ikustarazteko; euro baten truke eskuratu ahal izango dira karpan bertan, eta dagoeneko salgai jarri dituzte AEKn, Berbaron, Ibaizabalen, Plateruenan eta Antonio´s tabernan. Horrez gain, Kurutziaga iturri alboko karpan jan-edanerako aukera eta musika eskaintza berezia eskainiko dutela azaldu dute. Euskal musika ipiniko dute DJ Koolek urriaren 11n eta DJ Elepuntok urriaren 21ean.

Bestalde, urtero legez, GUKAko karpan mezu ironiko eta umoretsudun txapak banatuko dituzte, doan. Hona hemen pasa den urteeetako txapa batzuen irudiak:

Durango ere izango da Zinemaldian, ‘Handia’ filmarekin

Igande honetan aurkeztuko dute Donostiako Zinemaldian Altzoko Handiaren istorioa kontatzen duen ‘Handia’ filma. Ikusmin handia sortu du pelikulak, eta Durangon bertan jende asko egongo da filma ikusteko irrikitan; izan ere, XIX.mendeko erraldoi haren azalean sartu den aktorea Eneko Sagardoy durangarra da, eta Durango bera ere agertuko da filmeko eszenetako batzuetan. Iazko maiatzean filmatu zituzten ‘Handia’-ko eszena batzuk Santa Ana plazaren inguruetan, eta hainbat durangar ibili ziren estra lanetan.

Gainera, Zinemaldiko Sail Ofizialean lehiatuko den hirugarren euskarazko filma izango da ‘Handia’.

Hemen duzue filmaren trailerra:

Durangon, iazko maiatzean filmazioan ateratako argazkiak:

Eta aste honetan, Eneko Sagardoi aktoreari Durangaldeko Anboto astekarian egin dioten elkarrizketarako lotura.

Durangon euskara eta dantza debekatu zituztenekoa

Duela 80 urte, 1937ko maiatzaren 20an, debekatu zuten lehen aldiz euskaraz berba egitea autoritate faxistek. Donostian eman zuten lehen agindu hura, Bilbora sartu baino hilabete lehenago. Efemeride horren harira, Bizkaiko gobernadore militarrak Durangon euskara eta dantza debekatzeko idatzi zuen agindu baten inguruko artikulua argitaratu du asteon Mugalari.info atariak, eta Dantzan.eus webguneak euskarara ekarri du albistea.

Hemen duzue Durangon, 1938ko martxoaren 30ean,  idatzi zen agindua:

Durangoko udal artxiboko dokumentua

Korrikaren lekukoa gure eskuetan!

Pasa den ostiralean, eguzkia lagun, 20. Korrikari ongietorria eman genion udaleko langileok eta Udal Euskaltegiko ikasleek. Giro ederra izan genuen, eta hemen dituzue argazkiak, nerbioz eta adrenalinaz betetako momentuen erakusgarri! Korrika joan da, eta orain guri egunero lan egitea dagokigu. Aurretik, oporrak. Ondo-ondo pasa, eta laster arte!

 

Korrikak 2.000 kilometro inguru egin ditu, eta badator Durangaldera!

Pasa den ostegunean Otxandiotik abiatu zen euskararen aldeko lasterketa, eta gaur arratsaldean izango dugu gurean. Gogoratu plana:
– 17:45: Andra Marian, familia argazkia lekukoa eroango dugun guztiokin
– 18:00: Gambrinus tabernara joango gara
– 18:30: Lekukoa hartuko dugun lekurantza joango gara; Sasikoa kalean, Frai Juan Zumarraga institutu atzean.

Korrika pasa eta gero, Durangon plan polita dago:
– 19:30: Triki-batukada poteoa Andra Maritik hasita.
– 21:30: Korrika afaria Plateruenean. Nagusiek 15 euro, umeek 6. Txartelak Plateruenean eta Abarrak euskaltegian.
– 23:00 Korrika Jaia. Dj. Bull.

Atzo, beroketak egiteko, Durangoko ikasleek Korrika Txikian parte hartu zuten. Herriko kaleetatik arineketan egin eta gero koreografia dantzatu zuten Landako Gunean.

Eta amaitzeko, 20.Korrikak orain arte utzi dituen irudi polit batzuk hemen:

Karkarren, ostadarra lagun

Goizaldean ere beti dago norbait Korrikan. Murillo de las Limas

Euforiaz saltoka Nafarroan

Barakaldon, lekukoa, padel surf-ean

AEK-ko lagunak Korrika.eus-eko atal honetan dabiltza argazkiak zintzilikatzen.

Gozatu Korrikaz, eta gero arte!!!

Korrikaren hasiera eta Durangorako planak

Urtza Errazti, atzo, Korrikako lekukoa hartzen lehena, Otxandion.

Badabil Korrika; badabiltza, tipi-tapa gelditu barik. 20. Korrikak bere bidea hasi zuen atzo Otxandion. Datorren asteko igandean, apirilaren 9an helduko da Iruñera, eta Durangotik, dakizuen bezala, astebete barru, apirilaren 7an pasako da.

Udaleko langileon kilometroan lekukoa nork eroango duen erabakitzeko bozketa egin dugu asteon, eta 44 pertsonen botoak jaso ditugu! Puntu gehien hiru lankide hauek jaso dituzte: Maite Euba, Nagore Uribe-Etxeberria eta Esteban Urain! Zuek hirurok izango duzue, beraz, Korrikako lekukoa eroateko ohorea. Zorionak!!

18:45 aldera sartuko da Korrika Durangora, eta ordubete lehenago, 17:45ean familia argazkia aterako dute Andra Marian. Udaletxean elkartu eta batera joan gaitezke Andra Mariara, eta gure kilometrorantza, Sasikoa kalera. Badator!!

DURANGOKO EGITARAUA – apirilak 7, ostirala

17:45 – Familia argazkia Andra Marian
18:45 – Korrika badator
19:30 – Triki-batukada potoea Andra Mariatik hasita
21:30 – Korrika afaria Plateruenan. Nagusiek 15 euro, umeek 6. Txartelak salgai daude Plateruenan eta Abarrak euskaltegian.
23:00 – Korrika Jaia, Dj Bull